Publicación: Búa Soneira, Mon (2013); "A mosca ou a inestabilidade: apuntes e materiais críticos", Thaumazein, Nº 6, pp. 19-27.
A mosca ou a inestabilidade: apuntes e materiais críticos
06/10/2013
Mon Búa
Soneira
Introdución
Non hai estado ruinoso da metafísica, nin hai unha única
metafísica. Todo é metafísico en tanto que poida pensarse como
unha rede significante de significantes, “metafísica polisémica,
metafísica de metafísicas”. Andrónico de Rodas chamoulle
metafísica a iso que Aristóteles nomeaba o estudo do «ser
en canto ao ser» que «se
di de moitas maneiras» e
que intenta clarexarse como a arte da interpretación (hermeneutiké).
No fondo de todo pensamento hai unha metafísica que é o esforzo de
mediación dun discurso, dunha expresión, dunha argumentación, dun
enunciado (hermeneia). Un esforzo que trata de traducir o
pensamento en palabras.
Pensar o ser, a estrutura da súa realidade, o sentido que fica na
súa interpretación, dicir o ser ─a
súa comprensión─,
inevitablemente, ten a postura dunha metafísica. A metafísica non é
unha forma de estudo, unha teoría concreta do ser ou calquera
argumento disciplinario, senón que, máis ben, vai acorde co que
acontece nas nosas vivencias (co que somos), Heidegger coméntao así
en ¿Qué es metafísica?:
«A metafísica pertence á
“natureza do home”. Non é nin unha disciplina da filosofía
académica nin un ámbito de ocurrencias arbitrarias. A metafísica é
o acontecemento fundamental do noso ser. É o noso ser mesmo».1
Agora ben, entendendo así a metafísica, imos a intentar traducir o
noso pensamento nun cosmos cotián que para algúns pode parecer
insensato, degradante ou, incluso, violento pero que non carece de
sentido ou comprensión algunha. Cremos, despois de todo o
compendio sagaz da
filosofía anterior, que o ser ten que comezar a tratarse cun
sentido máis carnal e propio de algo que lle rodea e que lle
pertence. A apertura ao ser non é senón empezar por ter un apetito
innecesario de irse cara iso que temos, que facemos no día a día e
que, en todos os casos, está inmerso no cotián. O ser é impensable
sen entender ou sen vivir a realidade de cousas oblicuas que andan ás
voltas connosco en todo momento. Pensada así a vivencia, sen
fenómenos nin ideoloxemas2
previos, ímonos a dar coa realidade máis brusca. Tal como veremos,
esta realidade brusca está formada por experiencias sensibles
diminutas, cousas individualizadas e atomizadas que deveñen outras a
cada instante, choques, arranxos e encontros materiais
que dan sentido a un todo múltiple. O xeito desta metafísica sería
o dunha ontoloxía do proceso que versa sobre aquel pensamento
escrito que é quen de atacar ao movemento, ao devir, á tolemia, ás
cousas cotiás que nos rodean, e que fan do pensamento unha realidade
máis propia a cada un de nós.
E xa que falamos tanto diso que nos pertence e co que andamos a
rodear seguido esa cousa pequena e desapercibida que ateiga tanta
importancia, que mellor exemplo que pensar as animadas moscas na súa
amplitude? Cal cousa senón que as moscas para pensar tal signatura
metonímica? Pensemos polo carreiro, a mosca encarna o lugar do
movemento, transnomea unha criatura cotián, moi familiar para todas
as culturas do mundo. Rodéanos, póñenos en cuestión (mosqueo),
sobrevoa o que non podemos tocar (aletexo), fainos cavilar nos
recordos (papar moscas) e, por suposto, aliméntase e xace
sobre un composto (in)orgánico que reafirma a nosa multiplicidade (a
merda). Estes catro epígrafes intentan resumir o que sería unha
mosca no panorama metafísico actual3,
no pensamento das cousas circundantes. A mosca exemplifica o
trastorno material da metafísica, do pensar mesmo, que non é senón
o movemento, as voltas, os zumbidos, un delirio que todos temos. A
mosca é unha base na fronteira do continuo desprazamento.
1)Aletexo
O papa Adriano morreu de asfixia. Indo cara unha fonte na súa volta
a Roma, abriu os beizos para engrolar un xiringo de auga, pero nese
mesmo intre, unha mosca desviada entroulle adentro da boca. Ao non
poder expulsala, só puido tragar un chisco de aire ata que faleceu
de asfixia.
Este aletexo das ás da mosca tráenos consigo “a aporía dun
pensar temporal”, axúdanos a comprender o tempo do pensar a
voces, a couces, a noces, a topes, etc. O exemplo da morte
inesperada de Adriano só é posible pola afirmación temporal dunha
oposición ao teoremático. Significa que o que ocupa o lugar agora
son os acontecementos máis que as esencias (o cambiante, o nómada,
o hidráulico, o heteroxéneo, o inestable, o temporal, o diferente,
o inconstante, o que ten lugar “en guerra”, nun espacio corporal
e carnal frente a un métrico, etc.). Este pensar temporal chámase,
con Deleuze, “residuo perpetuo”, “principio salvaxe do
Logos” ─o cal
identificaremos máis adiante coa merda─.
Atendendo a esta definición de ser salvaxe, imos a
pensar a mosca. Este individuo lampantín intervén na superación
dos problemas da metafísica tradicional de Occidente debido á
relación co dinamismo da realidade, isto é, un pensamento que se
caracteriza pola anexactitude4
frente á inexactitude do sensible (p. e. sensualistas) e á
exactitude do esencial (p. e. racionalistas). Ao pensar así, a
inestabilidade dunha cousa tan sinxela como o é unha mosca, i. e.
unha continxencia impredecible, chegamos á comprensión de que non
hai identidades, senón singularidades. Moscas pequenas e lixeiras
que aletexan ao ritmo da choiva atómica epicúrea. Este é o devir
que máis respecto impoñe.
Partimos de que o mundo é un feito consumado, un carreiro de saídas
esgotadas sobre o que se instaura un reino. Este espacio pode reinalo
a Necesidade, a Razón, o Sentido, o Fin, a Orixe, etc. Pero que este
estado de cousas estea consumado non se refire a ningún destes
reinos, senón ao puro efecto da continxencia —pura
inestabilidade—.
Entendido así, este espacio de apertura a todo o continxente
obríganos a pensar unha filosofía que xa non é enunciado do Fin ou
da Orixe das cousas, senón unha sensata teoría da continxencia e do
recordo dos feitos (tamén continxentes). Este espacio enténdese
como un lugar anterior ao de todo Sentido, tal como considera Epicuro
(antes Demócrito e despois Lucrecio), á filosofía do clinamen
para opoñerse a Platón e a Aristóteles. Sobrevén o clinamen,
isto é, o espazo inmanente dos desvíos infinitesimais, da cousa
máis pequena posible, que ten lugar en «non
se sabe onde nin como»5.
A moitos científicos tolos (Hidehiko, Ketaki ou Michael Dickinson,
deste último destaca coa a famosa conferencia “O voo dunha mosca”)
fascínalles dos insectos a súa particularidade extraterrestre.
Incluso chegan a afirmar que o voo dos insectos conforma o evento
máis relevante da historia da evolución. Noutras verbas, sen
insectos non habería ningunha pranta de floración, sen pranta con
flores non habería intelixentes comedores de froita realizando
“falas comúns”, etc.
Destes estudosos, o que podemos sacar en claro é que as moscas teñen
boas capacidades (físicas) e voan a xeito (mecánico). Estas
descricións fisiolóxicas quedan, aínda que non en todos os
aspectos, na contra dunha ontoloxía do proceso que pensa o voo da
mosca como o devir-tempo e o materialismo aleatorio (máis
adiante na parte sobre a merda).
Ocorre de xeito habitual que a forma en como se trata a experiencia é
o que marca a diferencia. Algo que si vai en contra do aletexo dende
o punto de vista da ciencia é a súa forma de ser temporal. Para a
metodoloxía científica é necesaria a estabilidade e a incorrupción
que posibilita a correcta medición. En cambio, o bater-se das ás da
mosca preséntase aquí como a saida máis obvia do determinismo
científico. O problema é que hoxe en día non dispoñemos dunha
teoría local que elimine o indeterminismo e, por iso, é máis
realista aceptar éste. A actitude determinista da ciencia atópase
unha e outra vez ante a necesidade de admitir o indeterminismo
efectivo da realidade, pois incluso en sistemas mecánicos
rigorosamente deterministas a sensibilidade respecto das variacións
mínimas (clinamen en Lucrecio, parénklesis en
Demócrito) das condicións iniciais pode producir o que se chama
“caos determinista”. Non queda outra que aceptar un universo onde
as leis básicas sexan a inestabilidade, o azar e a irreversibilidade
(isto mesmo chegan a afirmar certos filósofos da ciencia, como
Prigogine). A mosca vivifica esta inestabilidade do azar, é cría da
desviación atípica inmersa na natureza
dos feitos empíricos sobre os que a ciencia pretende fixar un
grao de obxetividade.
2) Mosqueo
Para comezar a entender que relación hai coa expresión da violencia
dun mosqueo faremos referencia á fábula de La
Fontaine, A dilixencia e a mosca6
na que unha mosca, non facendo máis que aturullar aos cabalos,
ao cocheiro e aos viaxeiros, atribúese a si mesma o mérito dunha
gran subida e dificultosa andanza. Coincidimos en que é a mosca7
e non os cabalos quen tiran pola dilixencia. A mosca entendida como o
cabreo dos cabalos é a principal forza que tira da dilixencia, do
tren deste mundo. O galope forzado dos cabalos non sería quen de
rexir e dar direción á dilixencia, de non ser por un mosqueo ou
alteración continua dos efectos destes átomos individualizados,
xerme do tempo. Aquí a mosca colle a forza dunha potencia implícita
ás cousas que permite activalas, adozalas de enerxías, eo ipso,
a rabia pulsiva dun acontecemento. O mosqueo similar a unha vontade
de vontade ensalza as cualidades máis iracundas e carnais dun
ser. Un mosqueo que non é nin bo nin malo, nin estraño nin normal,
nin salvador nin perigoso, nin nada diso.
Incluso poderíamos pensar este mosqueo máis ao favor das
concepcións positivas do Mal que se dan entre recoñecidos
filósofos. Destacariamos así a de Sade, de Bataille ou de
Klossowski; cada un a súa maneira recollen intentos de dar unha
énfase afirmativa do Mal. A súa afirmación improdutiva permite ao
home seguir en pé, facendo da súa necesidade terrorista unha
afección saciada e cumprida. A mosca saca dos cabais ao home, para
ensalzar a cualidade positiva del mesmo como lle fixo aos cabalos da
dilixencia de La Fontaine. Poderiamos convencernos desta postura
antiética e tomar a ira como un principio que se inxire a cada
instante e do que debemos facernos amigos, aceptalo como delirio
propio da nosa linguaxe8.
O mosqueo aparece como o reflexo das relacións humanas
contemporáneas, toda acción volitiva está constituida en base a
esta concepción positiva do Mal, a este arranque iracundo que
prepara a zona de irreductible indiferenciación9
entre as cousas boas e malas, entre a anomia e o dereito diría
Agamben. Nin sequera nun entre, nun enser, nunha
intersubxetividade, o mosqueo radica sempre outro, vaise a un áfora
que queda sempre dentro. Queda indistinguido. A risa, o humor, o
chiste e o cómico son grandes exemplos da afirmativa posición do
mosqueo.
É necesario pensar no boíño de Virxilio10,
cando nos seus últimos anos empezaba a disfrutar dunha tolemia
basada nun mosqueo concreto coa lexislación romana. Parece ser que a
Octaviano e a Marco Emilio Lépido ocorréuselles unha nova lei pola
cal se expropiarían terras da nobilitas para ofrecerllas aos
soldados-campesiños retirados. Nesta nova lei de expropiación había
un detalle: resulta que quedaban excluidas de expropiación aquelas
terras que foran consideradas terra sacra. É así que as
terras consagradas non se podían doar aos ex-soldados.
Sabendo isto, podemos entender por que Virxilio nas súas terras
mandou construir un mausoleo para que repousaran os restos dunha
pequena amiga. Pese a que a súa amiga era pequena, atomizada,
individual, desviada e toliña merecía o gasto de oitocentos mil
sestercios nun mausoleo: ela era unha mosca.
Os mosqueos coa nova lexislación permitiron facer da súa terra unha
terra sacra, coa historia das historias destinada ao repouso
espiritual dunha mosca. Que risa, que despropósito, que mosqueo era
ese do tolo de Virxilio, que foi quen de preparar fulgurantes
celebracións fúnebres en honra da súa querida mosquiña. Así é
que, a estas ceremonias non dubidaron en acudir moitos conveciños
que se afanaban en tal francachela. Ese día choraron as penas dunha
mosca e Virxilio dou forma ao seu mosqueo político11.
3) Merda
No plano da merda perviven os individuos, vivos e mortos
─indiferentemente─, atomizados, o vacío da merda establece a
condición do movemento das moscas moi distinta á liberdade do
estado de natureza hobbesiano. En todos os exemplos do estado de
natureza que se fixeron, dende pensadores do Dereito natural, podemos
ficar na consideración dun estado de guerra e paz que se opoñen.
Pola contra, a merda non permite este tipo de conexións opostas, de
negación, pois a diferencia destes dous palabros non é senón
unha mesma cousa. Heidegger con frecuencia cita o belo verso de
Holderlin, éste que di: «onde está o perigo, surxe tamén a
salvación», a merda cíñese a un desgaste final de feitos que
retornan á unidade primordial, a unha coincidentia oppositorum,
onde os lindes de toda forma se disolven e tornan individuacións.
Fican sendo individuacións atomizadas, tal que moscas, diría
Deleuze «individuacións sen identidade», singularidades que teñen
de bo o que teñen de malo [anti(t)éticas].
Para definir a merda, a partires
dunha coincidencia de opostos que se disolven nela, é preciso
pensar este lugar
en referencia a certo tipo de materialismo. Non sería un
materialismo histórico, dialéctico ou mercantilista senón que
sería máis ben un materialismo
aleatorio que nos
permite entender o encontro
como condición para a continxencia.
Para pensar o materialismo, sobre
todo despois de Althusser, non podemos cinguirnos a unha espiral
dialéctica senón, a un acontecer sen mecanicismos, sen viravoltas
idealistas e sen «logaritmos amarelos». Althusser comenta que o
único materialismo concebible é «o materialismo da choiva, da
desviación, do encontro (rencontre) e da toma de consistencia
(prise)»12
. Pero este pensador non quixo avanzar máis nesta postura
ontolóxica, non quixo pensar de verdade ao que se estaba enfrontando
cando buscaba un materialismo único. Máis aló disto, aquí
sostemos que tal materialismo só é concebible dunha maneira radical
e sen tapuxos, dunha maneira literal. Tal materialismo aleatorio co
que andamos a argallar sería, máis que o althusseriano,
radicalmente impolítico ou prepolítico13.
Isto é, entendemos o materialismo como humus
da terra, como o terrorismo máis basto da acción e da actividade
desviada humana levada ao conxunto máis sabio: a merda. A
descomposición (in)orgánica mantén vixente a definición do
materialismo, de feito, é a única maneira directa de pensalo sen
idealismos nin ocultamentos (políticos ou económicos). Só as
moscas saben desexar o verdadeiro materialismo que rodea todo o mundo
e exclúe as discusións infladas de retórica dunha docta
philosophia.
Se de verdade gustamos dun
materialismo que poida ficar como atinxido á temporalidade da
desviación e aos encontros dos átomos epicúreos, só queda empezar
polo básico unto da filosofía. Este unto evita unha teleoloxía,
unha política de
control, unha
dialéctica do suxeito ou Necesidade algunha. Só así, concebindo a
merda ou a descomposición atómica e (in)orgánica nunha inmanencia
pura e continxente, poderemos ser honestos coa definición única e
posible de materialismo.
4) Papar moscas
Di Wittgenstein que a tarefa do filósofo é a de ensinar á mosca a
saír da botella. A este dito comenta Bobbio que «esta imaxe,
elevada á representación global da vida humana, reflexa só unha
das posibles situacións existenciais do home, e non a máis
desfavorable. É a situación na que existe unha vía de saída
(evidentemente trátase dunha botella sen tapón); por outra parte,
fóra da botella hai alguén, un espectador, o filósofo, que ve
claramente onde está»14.
Agora ben, plantexada esta situación que nos lembra a caverna
platónica, que pasaría se tal filósofo non quixera ensinarlle a
saír da botella á mosca? Se preferise deixar á mosca embriagarse
por un azar consumado dentro da botella? Non sería esta a cruda
imaxe que rompe co dualismo das botellas (entrada e saída), das
cavernas e das liñas divisorias? Ademáis, tal cousa non evitaría o
telos ou a finalidade última de saír dun lugar no que
estamos (con ou sen saída)? O rumbo nunca ten dirección e a mosca
sábeo cando choca incesantemente co cristal da botella. Igual se
houbese viño dentro da botella tería máis motivos para quedar, de
sabelo sería canto menos máis necesario para a supervivencia dentro
da botella. A esta actitude antiteleolóxica e antidivisoria que non
pretende prestar atención á obxetividade da saída da botella é a
que nos referimos con papar moscas. A despreocupación dun
home mirando os ceos revela outros perigos críticos contra a saída
da botella, contra a atención pedagóxica, contra a obxetividade
disciplinaria. Todos papamos moscas de cotío e improvisamos co mal
ás agachadas, preferimos a risa co viño dentro da botella fronte a
seriedade do sepulcro da obxetividade.
Papar moscas é o xesto poético da existencia, nel nace a relación
do pensamento cunha sombra interior que improvisa o real co
sentimental. A paixón escondida dos nosos sentidos brota nese
esquecemento. Ese lugar impreciso, da labilidade atencional, recrea
un campo poético de pensamento. Holderlin relaciona a poesía cun
pensamento que supera o olvido do ser. O home esqueceuse do ser
debido a que sempre pensou o ser como se fose un ente (Deus ou Logos,
p. e.) —isto que non
deixa de repetir Heidegger, o olvido do ser—.
Pero este esquecemento hai que superalo coa apertura ao ser como unha
multiplicidade, cunha desatadura ontolóxica que se trae a nós
poetizando máis que calculando. O remedio do olvido dáse no Recordo
(Andenken), que só é posible o seu facerse de maneira
poética e non axiomática. Só é posible quedando perplexos mirando
as moscas «nun arroio que retrocede ata o manancial» di Horderlin.
Tal cousa é papar moscas.
A exploración minuciosa dos detalliños que contén a vida cotián
consiste no facerse propio de papar moscas, que non é outro que o
lugar que nos interesa “cando non nos interesa” o que se nos está
intentando explicar dende unha obxetividade. A fuxida a todas as
explicacións dadas que busca nun para si mesmo á pregunta da
poesía e o Recordo dos seus abismos. Abismos que proceden de
materiais residuais en movemento que, quizáis preconscientes, unidos
serían certo poema en verbo, i. e., poetizar. O máis cotián do
pensamento é un poema, ás veces, non literario. Pero ten de poético
o «dicir e non o dito», con Heidegger. Máis que ser forte,
fundamento (Grund), a mosca aborda un Ser débil, construido
por un abismo (Abgrund) de recordos. Os entes-mosca atópanse
así en continua dislocación, sen un centro, en permanente
oscilación que constitúe o acontecemento (Ereignis), sempre
erradío. Este acontecemento do recordo vaise axenciando dun xeito
cada vez máis inseguro, débil e impolítico.
O lugar abismal dos recordos tráenos á memoria aquelas clases na
escola da infancia que con tanto amor desatendiamos e que, pouco a
pouco, fóronnos ensinando isto que é papar moscas.
1Heidegger,
M.. (2000). ¿Qué es metafísica? Madrid: Alianza Editorial.
p. 93.
2Fredric
Jameson concibe o ideoloxema como unha forma de praxis social, un
procedemento que proporciona unha resolución simbólica a un
problema histórico concreto.Jameson, F. (2009). Arqueologías
del futuro. El deseo llamado utopía y otras aproximaciones de
ciencia ficción.
Madrid: Akal.
3O
que interesa ao pensamento da mosca é un sistema filosófico
referido a circunstancias e acontecementos, só así é posible
renunciar á verdade para acollerse ao azar.
4Deleuze,
G. & Foucault, M., “Los intelectuales y el poder”. En:
Foucault, M. Un diálogo sobre el poder y
otras conversaciones. Trad. Miguel Morey.
Madrid: Alianza, 2004, pp. 23-35.
5Althusser,
L. (2002). Para un materialismo aleatorio. Madrid: Arena
libros. pp. 33-34.
6Rosseau,
J. J. (2006). Cartas
morales y otra correspondencia filosófica.
Madrid: Plaza y Valdés Editores. p. 243.
7Esta
fábula de La Fontaine recórdanos as moscas das que falaba J. P.
Sartre na obra de teatro As
moscas. Neste último
autor as moscas encarnan o papel das Erínias gregas que veñen a
cantar o fatalismo do destino que somete a Orestes e a Electra.
8«Cando
o home non fala, é falado».
Lacan,
J. (2007). “Le mythe individuel du nevrosé” en Du
symbole, et de sa fonction religieuse.
París: Seuil.
p.70.
9Agamben,
G. (1998). Homo sacer
I. El poder soberano y la nuda vida.
Valencia: Pre-Textos. p.19.
10Agustín
García Calvo conta que a Virxilio «en
Xan de Salisbury (s. XII) atopámolo, no medio dunha praga de
moscas, inventando unha mosca mecánica terrible que acabaría con
todas as da nación». García Calvo, A. (1976). Virgilio.
Madrid: Ediciones Júcar. pp. 45-46.
11Aquí
pensamos a mosca en dous sentidos, como individuo diminuto e
singular sobre a que recae a importancia da inestabilidade, do
desviado e do cotián (como aletexo); e como mosqueo, respecto do
ímpeto bromista de Virxilio de facerse coa lei e burlar as altas
esferas do goberno romano.
12Althusser.
L. Op. Cit, p.32
13Non
imos a deternos no clásico debate sobre “a posibilidade de pensar
o político antes ou despois da materia aleatoria”. A tese
defendida sería: prescindir do político por pensar que fronte ao
materialismo aleatorio non hai nada de político. O materialismo
aleatorio deixa o pensar político fóra de lugar, non hai soberanía
que se salve ou rixa a tal acontecer.
No hay comentarios:
Publicar un comentario